ನೀನು ನನ್ನ

ಜೊತೆಗಿರುವುದಾದರೆ

ನಾನು ಬೇಸಿಗೆ ಕಾಲದಲ್ಲೂ

ನನ್ನ ಎದೆಯ ಗೂಡಿಗೆ

ಆಹ್ವಾನಿಸುವ ಪ್ರೀತಿಯ ಅತಿಥಿ.

ಚುಕ್ಕಿ....

ನಿನ್ನ ಒಲವ ಬೀದಿಯೊಳಗೆ

ನನ್ನ ಪ್ರೀತಿಯ ತೇರ .

ಎಳೆಯಲಾಗದೇ ಬಿಕ್ಕಳಿಸುತ್ತಾ

ನಿನ್ನ ನೆನೆಯುತ್ತ

ನಾನು ನಿನಗಿಟ್ಟ ಹೆಸರು.

ಒಲವು...

ನಿನಗೆ ಅರ್ಥವಾಗದೇ

ಉಳಿದಿದ್ದು

ನನಗರ್ಥವಾಗಿಯೂ ನೀನು

ಅಳಿಸಿದ್ದು

ನನ್ನ ಎಲ್ಲಾ ನೋಟದಲ್ಲಿದ್ದಂತೆ

ನಿನ್ನೆಲ್ಲ ತಿರಸ್ಕಾರದಲ್ಲಿ ಕೂಡ.

ಮೌನ....

ಕಣ್ಣೀರಾಗಿ ಎಲ್ಲಾ

ಭಾರವನ್ನ ಹೊರಹಾಕುವುದಕ್ಕಿಂತ

ಸುಮ್ಮನೆ ಬಿಕ್ಕಳಿಸುತ್ತ

ಜನ್ಮಪೂರ್ತಿ ನಿನ್ನ ನೆನಪಿಡುವ

ಈ ಹೃದಯದ ಆರ್ತನಾದ..

ಧನ್ಯತೆ...

ಒಂದು ಸಾರಿ ನಿನ್ನ

ಹೆಸರಿಡಿದು ಕೂಗ್ತೀನಿ ಅಲ್ವ,

ಆ ಕ್ಷಣದಲ್ಲಿ ಈ ಎದೆಯ

ಗೂಡಿನಲ್ಲಿ ಅದ್ಭವಿಸುವ

ಪ್ರೀತಿಯ ದೇವರ ಮೂರ್ತಿ.

ಪ್ರಶ್ನೆ
-----------------------
ನಿನ್ನಿಂದ ಮನದ ಸರೋವರ
ರಾಡಿಯಾಗಿದ್ದಕ್ಕೆ ಬೇಸರವಿಲ್ಲ
ಮತ್ತದೇ ಹಳೆಯ ನೀರ ತುಂಬಿಸಲು
ನಾನೆಷ್ಟು ನೀರು ಸುರಿಸಬೇಕು
ಸ್ವಲ್ಪ ಹೇಳ್ತೀಯಾ?

ಸುಳ್ಳು
-----------------------
ನನ್ನಲ್ಲಿರುವ ಸಾವಿರ
ನೋವಿನ ಕವನಗಳಿಗೂ
ಮತ್ತೆ ಸಾವಿರಾರು ಕಣ್ಣೀರ
ಕಥೆಗಳಿಗೆ ನೀನೆ ಕಾರಣವಾದರೂ
“ಛೇ” ನೀನಲ್ಲವೆಂದು ಈ ಹೃದಯ
ಸುಳ್ಳೇ ಸಮಧಾನ ಮಾಡುವ ಕಲೆ

ಬಯಕೆ
-----------------------
ಈ ಮಳೆಗಾಲದಲ್ಲಿ
ಮಳೆಯ ಹನಿಯ ಜೊತೆ
ನನ್ನ ಕೆಲವೇ ಕೆಲವು ಬೆಚ್ಚನೆಯ
ಬಯಕೆಗಳೂ ಬೆರೆತು ಅವಳಲ್ಲಿ
ಸುರಿದು ಅವಳು ನಾಚಿ ಕೆಂಪಾಗಿ
ನಾನು ನೆನಪಾಗಿ ಹಬ್ಬವಾಗಬಾರದ.?
-----------------------

ನಿರಪರಾದಿಗಳು
-----------------------
ನಿನ್ನೆದೆಯಲ್ಲಿ ಜಾಗ
ಕೇಳಿದ್ದು ನಾನು,
ಇಲ್ಲವೆಂದಿದ್ದು ನೀನು,
ನೊಂದಿದ್ದು ಮಾತ್ರ ಹೃದಯ,
ಆದರೆ ಬೋರ್ಗರೆದು ಅತ್ತಿದ್ದು
ಮಾತ್ರ ಈ ಕಣ್ಣುಗಳು.

ಸಲಹೆ
-----------------------
ಪ್ರತಿ ಸಲ ಬೇಡ
ಅಂತಹ ದುರಾಸೆಯಿಲ್ಲ ನನಗೆ.!
ದಿನಕ್ಕೊಂದು ಸಲ ನನ್ನ ಕನಸಿಗೆ ಬಂದು
ಮತ್ತೆ ನಾಳೆ ಬರ್ತೀನಿ ಅನ್ನೊ
ಬರವಸೆ ಕೊಟ್ಟು ಹೋಗಿ ಬಿಡು

ಕಾಮ
-----------------------
ನಮ್ಮ ಗೆಳೆಯ ಗೆಳತಿಯರ
ಪ್ರೇಮದೂರಿನಾಚೆ ಇರುವ
ಕಾಡೊಳಗೆ ಅವಿತು
ಕುಳಿತಿರುವ ಒಂದು ಚಿರತೆ.

ಗೆಳೆಯ
-----------------------
ನಾನು ಜೊತೆಯಲ್ಲಿರುವಾಗಲೆಲ್ಲ
ಇವನ ಕಣ್ಣಿಗೆ ಕಸ ಬೀಳುತ್ತೆ,
ಅರ್ದ ತಿಂದ ಹಣ್ಣಿನ ಮೇಲೂ
ಇವನ ಕಣ್ಣು ಬೀಳುತ್ತೆ,
ಮಜಭೂತಾದ ಮಾರ್ಚ್ ತಿಂಗಳಲ್ಲೂ
ಇವನಿಗೆ ಚಳಿಗಾಳಿ ಬೀಸುತ್ತೆ.

ಕೋರಿಕೆ
-----------------------
ಪ್ರತಿ ಕಾಮನ ಬಿಲ್ಲಿಗೂ ಇವಳ
ಹೆಸರಿಡುತ್ತೇನೆ, ಹೆಸರಿಡಿದು
ಕೂಗುವಷ್ಟರಲ್ಲಿಯೆ ಮಾಯವಾಗುತ್ತಾಳೆ
ದೇವರಲ್ಲಿ ಯಾವತ್ತು ನನಗೆ
ಕಾಮನಬಿಲ್ಲು ಕಾಣಿಸದಂತೆ ಶಾಪ ಕೊಡು
ಅಂತ ಕೇಳಿಕೊಳ್ಳಬೇಕು !

ಕನಸುಗಳಿಗೆ
ಕಾರಣಳಾದವಳು
ಕನಸೇ ಆಗಿ ಹೋದವಳು.
-------------------------------
ಜಾಣತನ

ನಿನ್ನ ತೋಳುಗಳ
ಬಲೆಗೆ ಬೀಳದೆ
ನನ್ನ ಪಿಯೂಸಿ
ಪಾಸುಮಾಡಿಕೊಂಡಿದ್ದು.
-------------------------------

ಮೂರ್ಖತನ

ನನ್ನ ಕತ್ತಲೆಗೆ
ಬೆಳಕ ನೀಡದ
ನಿನ್ನೆರೆಡು ಕಣ್ಣುಗಳನ್ನ
ಬೆಳಗುವ ದೀಪಗಳಿಗೆ
ಹೋಲಿಸಿ ಪದ್ಯ ಬರೆದಿದ್ದು.
-------------------------------
ಭಾವನೆಗಳು

ಹೃದಯವೆಂಬ
ತೋಟದಲ್ಲಿನ
ಸುಂದರ ಹೂವುಗಳು
-------------------------------
ನೀನೆಂದರೆ

ನನ್ನರ್ದ
ಕನಸುಗಳಿಗೆ
ಕಾರಣ..
ಇನ್ನರ್ದ
ನೋವುಗಳಿಗೆ
ಪ್ರೇರಣ.
-------------------------------

ನೆನಪು

ನನ್ನ ಸಕಲ
ನೊವು ನಿರಾಸೆಗಳಿಗೆ
ನಾನು ಕಂಡುಕೊಂಡ
ಔಷಧ.
-------------------------------

ಹಾರೈಕೆ

ಹೃದಯಗಳೇ
ನೀವು ಕಳೆದುಕೊಂಡ
ಒಲವೆಲ್ಲ
ಇಂದಲ್ಲ ನಾಳೆ
ಉಲ್ಕೆಗಳ ರೂಪದಲ್ಲಿ
ಸುರಿದು ಬರಲಿ.
-------------------------------
ತೃಪ್ತಿ

ನಲಿವೇ ಆಗಬೇಕೆಂದಿಲ್ಲ
ನಿನ್ನೊಲವಿನ
ನೋವಾದರೂ ಸಾಕು.
-------------------------------

ಮಾಯಗಾತಿ.

ಬೆಂಬಿಡದೆ ಕಾಡುತ್ತೇವೆಂದ
ಕಹಿ ಕನಸುಗಳಿಗೆ
ನಿನ್ನ ಒಲವ ಕುರಿತು ಹೇಳಿದೆ
ಪಾಪದ ಕನಸುಗಳು ಕೂಡ
ಕನವರಿಸುತ್ತಿವೆಯಂತೆ ನಿನ್ನ.
-------------------------------

ಸಾಮ್ಯತೆ.

ನೀನು ನನ್ನಿಂದ
ದೂರಾಗುತ್ತಿರುವುದಕ್ಕೂ
ನಾನು ಸಾವಿಗೆ
ಹತ್ತಿರವಾಗುತ್ತಿರುವುದಕ್ಕು
ಅಂತಹ ವ್ಯತ್ಯಾಸವೇನಿಲ್ಲ ಬಿಡು
-------------------------------

ಸಾಗರ.

ನಿನ್ನ ಒಲವು
ಮತ್ತು ಅದರ
ವಿಶಾಲತೆಯ ಮುಂದೆ
ಸೋತು ಸುಣ್ಣವಾಗಿದ್ದು.
-------------------------------

ಹೃದಯ.

ನಿನ್ನನ್ನ ಕಣ್ಣುಗಳಲ್ಲಿ
ತುಂಬಿಕೊಂಡ ದಿನ
ನಲಿದಾಡಿದ್ದು
ದೂರಾಗುತ್ತಲೇ ಅತ್ತು
ಗೋಳಾಡಿದ್ದು.
-------------------------------

ನಿಜ.

ಗಟ್ಟಿಯಾಗಿ ನಿನ್ನ
ಕೈ ಹಿಡಿದಿದ್ದು
ಆಸೆಯಿಂದಲ್ಲ..
ನನ್ನ ಬಿಟು ಹೋಗುತ್ತೇನೆಂದ
ನಿನ್ನ ಮೇಲಿನ ಬಯದಿಂದ.
-------------------------------
ಸುಳ್ಳು.

ನನ್ನ ಕನಸಿಗೆ ಪ್ರತಿ ದಿನ
ನೀನು ಬರುವುದೇ
ಇಲ್ಲವೆಂದು ಎದೆತಟ್ಟಿಕೊಂಡು
ನಾನು ಹೇಳಿದ್ದು.
-------------------------------

ದುರಂತ.

ನಾನು ನಿನಗೆ
ನೆನಪಾಗದಿರುವುದು
ನೀನು ನನಗೆ ನೆನಪೇ ಆಗಿರುವುದು.
-------------------------------

ಸುಳ್ಳು.

ನಿನ್ನ ಕನಸಿಗೆ ನಾನು
ನನ್ನ ಕನಸಿಗೆ ನೀನು
ಬಂದೇ ಇಲ್ಲವೆಂದು
ಎದೆತಟ್ಟಿಕೊಂಡು ಹೇಳಿದ್ದು.
-------------------------------

ಗುಲಾಬಿ.

ನನಗಿಂತಲೂ
ಮೊದಲೇ
ನನ್ನವಳ ಬಂಗಾರದ
ಬೆರಳ ಸ್ಪರ್ಶಿಸಿದ
ನನ್ನ ಪ್ರೀತಿಯ ಶತೃ.
-------------------------------

ಶಾಪ

ದೇವರೇ ಅವನಿಗೋಸ್ಕರ
ಕೂಡಿಟ್ಟ ಅಷ್ಟು
ಕನಸುಗಳಲ್ಲಿ
ಒಂದಾದರು ಸುಳ್ಳಾದರೆ
ನಿನಗೆ ಮರಣ ಬರಲಿ.
-------------------------------

ಬಾ

ಎದೆಯ ದೀಪ
ಉರಿದು ದಣಿದು
ಆರುವ ಮುನ್ನ.
-------------------------------
ನಾನು

ನಿನ್ನ ನೆನಪೆಂಬ ನೋವುಗಳ
ಗೋಡೆಗಳಲ್ಲಿ ಪ್ರೀತಿಯ
ಚಿತ್ರ ಬಿಡಿಸುತ್ತ ನಿಂತ
ಒಬ್ಬ ವಿಧೂಷಕಿ ಅಷ್ಟೆ.
-------------------------------

ಬಯಕೆ

ಈ ಎದೆಯ
ಅಗೆದು ಬಗೆದು ಮೀಟಿ
ತೋಟ ಮಾಡಿ
ನನಗೊಂದು ಗುಲಾಭಿ
ಕೊಡ್ತೀಯಾ ಗೆಳೆಯ..
-------------------------------

ತುಂಟ

ಗೆಳತಿ ತನ್ನ ಹಣೆಗಿಟ್ಟ
ಅಷ್ಟೂ ಮುತ್ತುಗಳ
ಹೊರತಾಗಿಯೂ, ತನ್ನದೇ
ಕೆನ್ನಗಿಲ್ಲವಲ್ಲವೆಂದು ಜಗಳ ತೆಗೆದ
-------------------------------

------------------------------------------------------
ಇವೆಲ್ಲ ಕನ್ನಡದ ದಿನಪತ್ರಿಕೆ ವಿಜಯ-ಕರ್ನಾಟಕದಲ್ಲಿ ಪ್ರಕಟವಾದಂತವು...:)
------------------------------------------------------

(ಜನವರಿ 2007)

(ಜನವರಿ 2007)